स्वातंत्र्याच्या ७५ वर्षांनंतरही बिनागुंडा परिसर विकासापासून कोसो दूर ; डॉ. उसेंडी यांनी प्रत्यक्षात जाणल्या स्थानिकांच्या समस्या 

GADCHIROLI TODAY

गडचिरोली : दिल्ली येथे नवीन संसद भवनाचे उद्घाटन पंतप्रधानांच्या हस्ते नुकतेच करण्यात आले. त्याच दिवशी महाराष्ट्र प्रदेश आदिवासी काँग्रेसचे प्रदेशाध्यक्ष डॉ. नामदेवराव उसेंडी यांनी भामरागड तालुक्यातील बिनागुंडा व परिसरातील गावांना भेट देत समस्या जाणून घेतल्या. तसेच या अतिशय दुर्गम नक्षलग्रस्त बिनागुंडा परिसरातील गावांचा विकासाचा हक्क हिरावून घेतल्याचे मत डॉ. उसेंडी यांनी व्यक्त केले.
बिनागुंडा हे गाव लाहेरी पासून २९ किलोमीटर अंतरावर आहे. लाहेरी ते बिनागुंडा जाण्यासाठी रस्ता नसल्याने जवळपास तीन तास लागतात. पावसाळ्यात व हिवाळ्यात रस्ता नसल्याने त्या भागातील आजारी व्यक्तींना लाहेरीपर्यंत आणण्यासाठी लोकांना खाटेचा आधार घेऊन पायदळ प्रवास करावा लागतो. त्यामुळे बरेचदा गरोदर माता, मलेरिया व वेगवेगळ्या आजाराच्या रुग्णांचा रुग्णालयात आणतानाच मृत्यू होतो. बिनागुंडा येथे आरोग्य उपकेंद्र असून सुद्धा नियमित आरोग्य सेविकेची नियुक्ती नसल्यामुळे स्थानिक पातळीवर आपत्कालीन उपचारापासून लोकांना मुकावे लागते. स्थानिक पातळीवर ए एन एमचे शिक्षण घेतलेल्या दोन-तीन मुली असून त्यांना त्याठिकाणी नियुक्ती केल्यास प्राथमिक उपचार रुग्णांना देऊ शकतात. परंतु, शासन व जिल्हा परिषद यांच्याकडे लोकांनी वारंवार नियुक्ती करण्याची विनंती करून सुद्धा नौकर भरती बंद असल्याने त्यांची नियुक्ती रखडलेली आहे. या भूमिकेमुळे एका बाजूला सेवा देणाऱ्या नर्सेस बेरोजगार आहेत. तर दुसऱ्या बाजूला जनता आरोग्य सेवेपासून वंचित आहे. हा विरोधाभास शासन दूर करेल काय हा प्रश्नचिन्ह निर्माण झालेला आहे.
या भागात वीज पुरवठा नसल्याने सोलर लाईटची व्यवस्था केल्यास काही प्रमाणात विजेचा प्रश्न सुटू शकतो. परंतु, याकडे सुद्धा शासन स्तरावरून दुर्लक्ष होताना दिसून येत आहे. बिनागुंडा येथे नॅशनल सेंटर फॉर रुरल डेव्हलपमेंट नागपूर द्वारा संचालित विनोबा भावे प्राथमिक आश्रम शाळेची सुरुवात १९८८ पासून झालेली आहे. एकंदरीत १०० विद्यार्थी या आश्रमशाळेत शिक्षण घेत आहेत. परंतु, ३४ वर्षात सुसज्ज आश्रम शाळेची इमारत होऊ शकली नाही. आजही बांबूच्या तट्याचा व टिनाच्या इमारतीत ही आश्रम शाळा भरत आहे. परंतु, आश्रम शाळेमध्ये सुद्धा नियमित दर्जेदार शिक्षणाचा अभाव आहे. पावसाळ्यात ही आश्रमशाळा बंदच असते. फक्त हिवाळा, उन्हाळ्यामध्ये अधून-मधून सुरू असते. त्यामुळे मोठ्या प्रमाणात शैक्षणिक नुकसान होत आहे. या भागातील जमीन सपाट नसल्यामुळे उत्पादनाची साधने सुद्धा अपुरी आहेत. तसेच संजय गांधी श्रावणबाळ या योजनांच्या किचकट अटीमुळे व प्रशासनाच्या दुर्लक्षामुळे या योजनेपासून येथील नागरिक वंचित आहेत. या नागरिकांना या योजनांचा लाभ द्यायचा असल्यास बिनागुंडा येथे प्रशासनाने विशेष शिबिर घेऊन तेथील लोकांचे अर्ज भरून घेणे गरजेचे आहे.
बिनागुंडा परिसराला निसर्गाने भरभरून दिले आहे. अहेरी मध्ये ४५ अंश तापमान असल्यास बिनागुंडा परिसरात मात्र २५ अंश तापमान असतो. येथील निसर्गरम्य नद्या, नाले, पहाड गडचिरोली जिल्ह्यातील काश्मीर आहे की काय असा नैसर्गिक सौंदर्य या भागाला लाभलेला आहे. बिनागुंडा येथील धबधबा हा उन्हाळ्यात सुद्धा वाहत असल्याने शासनाच्या माध्यमातून पर्यटनस्थळ म्हणून विकसित केल्यास स्थानिक लोकांना रोजगार उपलब्ध होऊ शकतो. महाराष्ट्र राज्याचे माजी मंत्री डॉ. श्रीकांत जिचकर नंतर आजपर्यंत कोणत्याही खासदार, आमदारांनी या गावांना भेटी दिल्या नाहीत. या गावाला राजकीय दृष्टिकोनातून न पाहता सामाजिक दृष्टिकोन ठेवून विकास करण्याची राजकीय इच्छाशक्ती असल्यास या भागाचा विकास होऊ शकतो. परंतु या भावनेचा राज्यकर्ते व प्रशासनामध्ये अभाव असल्याने स्वातंत्र्याचा ७५ वर्षानंतरही या भागाचा विकास हिरावल्या गेलेला आहे. एका बाजूला स्वातंत्र्याचा ७५ व्या अमृत महोत्सव साजरा करण्यासाठी कोट्यवधी रुपये खर्च केले जातात. परंतु, बिनागुंडा परिसरात राहणाऱ्या आदिम जमातीच्या विकासासाठी नियोजन न करणे हा स्वतंत्र्याचा फार मोठा अपमान आहे, असे मत महाराष्ट्र प्रदेश आदिवासी काँग्रेसचे प्रदेशाध्यक्ष तथा माजी आमदार डॉ. नामदेव उसेंडी यांनी व्यक्त केले आहे.