रक्तदानाचे कार्य पवित्र व पुण्याचे – कर्नल संग्राम महापात्रा ; कोनसरी येथील रक्तदान शिबिरात ७० रक्तदात्यांनी केले रक्तदान

रक्तदानाचे कार्य पवित्र व पुण्याचे : कर्नल संग्राम महापात्रा
– कोनसरी येथील रक्तदान शिबिरात ७० रक्तदात्यांनी केले रक्तदान
– लायड्स मेटल्स अँड एनर्जी लिमिटेड कंपनी कोनसरी व जनहित ग्रामीण विकास बहुऊद्देशिय संस्थेचा पुढाकार

GADCHIROLI TODAY
चामोर्शी : देशात अपघातांची संख्या मोठ्या प्रमाणात वाढलेली आहे. तसेच विविध आजारांच्या प्रमाणात वाढ झाल्याने देशात रुग्णांना रक्ताच्या साठ्याची कमतरता भासत आहे. अशातच विविध संस्था, सामाजिक संघटना रक्तदानासाठी पुढाकार घेत आहेत. अशा रक्तदान शिबिरांमधून रक्तदानासारखे कार्य केले जात आहेत. हे कार्य पुण्याचे व पवित्र कार्य आहे, असे प्रतिपादन लायड्स मेटल्स अँड एनर्जी लिमिटेड कंपनी कोनसरी उपाध्यक्ष (कॉर्पोरेट सर्विस) कर्नल संग्राम महापात्रा यांनी केले.
जागतिक लोकसंख्या दिवसानिमीत्त ११ जुलै रोजी लायड्स मेटल्स अँड एनर्जी लिमिटेड कंपनी कोनसरी व जनहित ग्रामीण विकास बहुऊदेशिय संस्था येनापुर यांच्या संयुक्त विद्यमाने भव्य रक्तदान शिबिराचे आयोजन प्राथमिक आरोग्य केंद्र कोनसरी येथे करण्यात आले होते. सदर रक्तदान शिबिरात एकूण ७० रक्तदात्यांनी रक्तदान करून सामाजिक बांधीलकी जोपासली. याप्रसंगी उद्घाटक म्हणून महापात्रा बोलत होते.
यावेळी प्रमुख अतिथी म्हणून ग्रामपंचायत कोनसरी चे सरपंच श्रीकांत पावडे , बिश्वनाथ ढाल ( AGM safety), सीएसआर विभाग प्रमुख संजय पोतराजवार , उपसरपंच रतनराव आक्केवार , ग्रामपंचायत सदस्य राकेश दंडिकवार , स्वप्नील बोनगीरवार, वैद्यकीय अधिकारी डॉ. महेंद्र पेदाला, तसेच जनहित ग्रामीण विकास बहुऊद्देशिय संस्थेच्या अध्यक्षा सुनीताताई बंडावार, उपाध्यक्षा वर्षा भंडारवार, कोषाध्यक्ष रवींद्र जक्कुलवार, जिल्हा रक्तदुत रवींद्र बंडावार, ग्राम रक्तदुत जीवनदान भोयर तसेच लायड्स मेटल्स अँड एनर्जी लिमिटेड कंपनी कोनसरी येथील अधिकारी व कर्मचारी मोठ्या प्रमाणात उपस्थित होते.
जनहित ग्रामीण विकास बहुऊद्देशिय संस्थेच्या वतीने जिल्ह्यात रक्तदाता शोधमोहीम व जनजागृती अभियान प्रभावीपणे राबविली जात आहे. यामुळे अनेक युवक रक्तदानासाठी पुढे सरसावले आहेत. या माध्यमातून गरजू व अत्यंत गंभीर रुग्णांना वेळेवर रक्तपुरवठा केला जात आहे. सदर शिबिरात संस्थेच्या उपाध्यक्षा वर्षा भंडारवार यांनी रक्तदान करून एक आदर्श निर्माण केला. खर तर महिला वर्ग रक्तदान करीता सहसा पुढे येत नाही. परंतु भंडारवार यांनी स्वतः पुढे येत रक्तदान केल्यामुळे त्यांचे कौतुक केले जात आहे. रक्त संकलन करण्याचे कार्य गडचिरोली येथील जिल्हा रक्त संकलन पथकाने पार पाडली.